Gara për Bashkinë e Tiranës do të jetë më e nxehta, jo për shkak të cilësië së kandidatëve, sesa për faktin sepse tradicionalisht kryeqyteti ka tërhequr më shumë vëmendje dhe pikërisht mbi atë, me të drejtë, bëhet investimi më i madh politik.
Nisur nga kjo, “JAVA News” ka bërë një sondazh të hapur për lexuesit e saj duke listuar pesë kandidatët për bashkinë e Tiranës si dhe duke u dhënë mundësinë shfletuesve të internetit që të zgjedhin edhe opsionin “Nuk do të votoj”.
Në sondazh marrin pjesë Erion Veliaj (Aleanca për Shqipërinë Europiane), Halim Kosova (Aleanca për Punë dhe Dinjitet), Gjergj Bojaxhi, Sazan Guri dhe Arben Tafaj të pavarur.
Në sondazhin e nisur më datë 11 Maj 2015 e deri më 18 Maj (Ora 16:00) kanë marrë pjesë 1,571 lexues duke shprehur pëlqimin e tyre përmes votës.
Nga rezultati i kësaj jave figuron se më i votuari është Erion Veliaj me 728 vota, ose 46% të votave virtuale. Ndërkohë, Halim Kosova vjen i dyti në votim me 27% apo 430 vota.
Sondazhi i “JAVA News” tregon se Gjergj Bojaxhi listohet i treti si më i votuari me 184 vota apo e thënë në përqindje, 12%.
Ambjentalisti Sazan Guri arrin në kuotën e 6% me 93 vota ndërsa listohet i katërti. Ai ndiqet nga kandidati i pavarur Arben Tafaj me 3% e përkthyer në vota, 44 të tilla.
I habitshëm është fakti se 6% e lexuesve (93 vota) janë shprehur se nuk do të votojnë. Pra zgjedhësit që nuk do të votojnë janë më të shumtë sesa votuesit e Tafajt.
Metodologjia e përdorur në këtë sondazh është aplikacioni WP-Polls dhe në të mund të votohet vetëm një herë me një IP. Pra, një kompjuter nuk mund të votojë më shumë sesa një herë. Kujtojmë se në sondazh votojnë edhe shqiptarë nga jashtë vendit, të cilët jo të gjithë do të votojnë në zgjedhjet e 21 qershorit.
“JAVA News” do të publikoj javë pas jave rezultatet e sondazhit të saj ndërsa ai do të jetë i hapur gjer mbrëmjen e datës 21 Qershor 2015.
