Ministri i Brendshëm Famtir Xhafaj ka reaguar pas votimit në parim të ligjit për Vettingun në polici.
Disa nga deputetët e opozitës kanë votuar pro, një veprim i cili është pritur me vlerësim nga ana e Ministrit të Brendshëm Fatmir Xhafaj.
Përmes një postimi në rrjetet sociale, Xhafaj ka falënderuar të gjithë deputetët që i dhanë dritën jeshile Vettingut në Polici, duke shtuar se me miratimin e pritshëm të ligjit javën e ardhshme, do të hapet një tjetër faqe e re për Policinë e Shtetit.
“Ligji i Vettingut mori driten jeshile nga Kuvendi. FLM te gjithe atyre qe e mbeshteten e punuan per kete nisme. Faleminderit kolegeve socialistë per voten e qarte PRO ketij projekti. FLM per ata kolege te opozites qe kontribuan ne kete proces duke e mirekuptuar voten politike te tyre.
Vleresim dhe mirenjohje per bashkepunetoret e mi qe punuan per kete projekt shume te rendesishem, per partneret vendas dhe ata nderkombetar.
Falenderim per Policine e Shtetit qe e ka mbeshtetur forte kete iniciative dhe kontribuoi per te.”-shkruan Xhafaj.
Kujtojmë se votimi i ligjit nen për nen dhe në tërësi u shty për javën e ardhshme për shkak të disa amendamenteve që u paraqitën në kuvend nga ana e LSI-së. Pritet që pas shqyrtimit të tyre në kuvend, të enjten e ardhshme parlamenti të votojë ligjin për kontrollin e figurës dhe pasurisë së policëve.
