Kryetarja e LSI-së, Monika Kryemadhi shprehet se partia që ajo drejton është e angazhuar për të miratuar një reformë zgjedhore me integritet të plotë, që t’u shërbejë qytetarëve. Gjatë takimit me Drejtorin për Europën Qendrore e Lindore të Institutit Demokratik Amerikan (NDI), Kryemadhi thotë se u diskutua për rëndësinë themelore që ka në demokraci vota e lirë dhe e barabartë.
“Sot pata kënaqësinë të zhvilloja një takim me z. Robert Benjamin, Drejtor për Europën Qendrore e Lindore të Institutit Demokratik Amerikan (NDI).
E falenderova për kontributin e dhënë gjatë bashkëpunimit shumë vjeçar të LSI me NDI. Për mbështetjen e pakursyer me ekspertizë amerikane dhe ndërkombëtare për rritjen e kapaciteteve të forumit rinor dhe atij të gruas, për realizimin e transparencës financiare të partisë, për rritjen e standardit të përfaqësimit dhe politikbërjes.
Diskutuam mbi rëndësinë themelore që ka në demokraci vota e lirë dhe e barabartë. Gjithashtu theksova angazhimin e LSI për një reformë zgjedhore me integritet të plotë që do i shërbejë interesit të qytetarëve dhe për të ardhmen e Shqipërisë në BE.
Vlerat e demokracisë euro-atlantike janë udhërrëfyesi më i mirë për forcimin e shtetit të së drejtës, tregut të lirë dhe garanci për ndërtimin e jetës në Shqipëri” shkruan Kryemadhi.
Opozita jashtë parlamentit nuk e njeh komisionin e ngritur nga Kuvendi me drejtues Damian Gjiknurin dhe Rudina Hajdarin nga opozita. PD-LSI dhe partitë e tjera kanë krijuar një komision politiko-teknik paralel që deri tani është mbledhur dy herë në selinë e PD-së dhe palët janë shumë larg njëra tjetrës.
g.kosovari
