Çdo emigrant shqiptar me të drejtë vote mund të regjistrohet në listën e zgjedhësve pa pasur si dokument vërtetimin e adresës së banimit në shtetin ku jeton.
Pra, nëse zgjedhësi nuk zotëron një dokument provues adrese në emrin e tij, i jepet mundësia të përdorë si provë në platformën PER, dokumentin provues në emër të një familjari të tij, por edhe të dikujt tjetër pa lidhje familjare.
Më shumë se 165 mijë janë zgjedhës unikë që kanë bërë kërkesë për regjistrim në platformën PER, afro 131 mijë i është miratuar, ndërsa janë refuzuar më shumë se 33 mijë.
Regjistrimi në platformën PER nisi më 11 janar dhe do të zgjasë deri në 4 mars dhe në tabelën e të dhënave për regjistrimin e votuesve nga jashtë, në kërkesat sipas qarqeve, Tirana ka më shumë aplikues, po ashtu edhe Italia ka numrin më të lartë të të regjistruarve, por edhe të miratuarve si edhe të kërkesave të refuzuara.
Në kërkesat sipas gjinive, 19% janë më shumë meshkujt se femrat dhe në grupmoshat vijojnë të jenë më të interesuar 26-35 vjeçarët.
Çdo shtetas që jeton jashtë me të drejtë vote, i jepet mundësia që në zgjedhjet parlamentare të 11 majit të votojë për herë të parë, ndaj dhe KQZ vijon të japë mesazhe që gjithkush të tregohet i kujdesshëm dhe t’i drejtohet për ndihmë asistencës.
