Policia e Shtetit ka proceduar penalisht gjyqtarin e Fierit Ergys Selmani, i cili akuzohet se nuk zbardhi vendimin e urdhrit të mbrojtjes për shtetasen Lilian Ruko, e cila më pas u vra barbarisht nga bashkëshorti që e hodhi nga dritarja e katit të 4-t.
Policia e Shtetit u vu në lëvizje pas zbulimit në media të urdhrit të mbrojtjes për gruan fatkeqe. Por, pas argumentimit të uniformave blu dhe ministrit se urdhri i mbrojtjes nuk mbërrit kurrë në polici për ekzekutim, policia e Fierit nisi procedimin penal me iniciativë për gjyqtarin.
Ja njoftimi i plotë i policisë:
Nga Sektori për Krimin Ekonomik e Financiar në Drejtorinë Vendore të Policisë Fier, filloi procedimi penal për “Shpërdorim detyre”, ndaj gjyqtarit të Gjykatës së Shkallës së Parë Fier, shtetasit E.S .
Ky procedim penal filloi pasi nga veprimet e para hetimore rezulton se në shkelje të ligjit ka neglizhuar zbardhjen dhe dërgimin në kohë të vendimit për mbrojtjen e shtetases L.R , institucioneve pergjegjëse.
Më pas ka ardhur pasoja e rëndë e vrasjes së shtetases L.R nga bashkëshorti i saj.
Materialet e para hetimore i kaluan Prokurorisë për hetime të mëtejshme për veprën penale të shpërdorimit të detyrës.
/a.m.
