Për herë të parë në historinë e vendit, emigrantët po votojnë nga jashtë vendit për parlamentaret e 11 majit. Ndërsa procesi i shpërndarjes është drejt përfundimit, 4163 zarfe po vonohen, për shkak të adresave të paplota të deklaruara nga aplikuesit.
Komisioni Qendror i Zgjedhjeve po punon për të verifikuar dokumentacionin në platformën e aplikimit, PER me qëllim plotësimin E ADRESAVE dhe dërgimin e zarfeve sa më shpejt tek qytetarët.
Sipas të dhënave zyrtare, rreth 120 mijë zarfe janë tërhequr nga qytetarët ndërsa 8.637 emigrantë kanë votuar dhe zarfet kanë mbërritur në KQZ.
Zarfet po monitorohen 24 orë nga kamera të sigurisë, por dhe përfaqësues të partive politike.
KQZ apelon emigrantët të tërheqin pakot zgjedhore deri në datën 5 maj në të kundërt ato do të rikthehen në Shqipëri.
Zarfet e tërhequra duhet të mbërrijnë në territorin e Republikës së Shqipërisë para orës 19:00 të datës 11 maj, pasi çdo pako zgjedhore që vjen pas këtij afati do të jetë e pavlefshme.
