Pas Tiranës, Shkodra mbetet vatra më e madhe e koronavirusit në Shqipëri ku vetëm gjatë orëve të fundit janë raportuar 11 raste të reja.
Kryebashkiakja Voltana Ademi duket se nuk e ka të qartë politikën që po ndjek shteti shqiptar në lidhje me testimet dhe gjurmimet.
Ademi ka reaguar duke thënë se shumë familje me dëshirën e tyre duan të bëjnë testet, por janë refuzuar nga instucionet përgjegjëse shëndetësore.
Në një deklaratë për mediat, Voltana u shpreh:
“Unë jam e bindur dhe ka denoncime në Shkodër që janë familje të tëra në shtëpi, që nuk e kanë pasur të mundur t’u bëhet testi apo që kanë raportuar te 127 dhe nuk u është bërë testi. Prandaj, ky çekani që bie nuk ka lidhje me bashkëpunimin, por me nevojën që duhet të merren përgjegjësi, që nuk mund t’u lihen vetëm njerëzve për t’iu kërkuar që të izolohen. Kjo është një masë që tregon se shteti nuk ekziston dhe shteti nuk të përgjigjet në testim. Fakti që kjo u lihet vetëm qytetarëve, mendoj se kjo nuk është e drejtë. Kjo është ajo trumbetimi që kam bërë unë për të marrë disa përgjegjësi.”
Ademi theksoi se në Shkodër mungon përgjegjësia për t’ju qasur nevojës së domosdoshme, për t’ju përgjigjur asaj që ka qenë domosdoshmëri. Deri tani, qyteti në veriperëndim të vendit ka raportuar gjithsej 94 raste me koronavirus.
/a.r
