Sekuestrohen 5 kg heroinë në Tiranë gjatë operacionit të policisë të koduar “Vollga” ku në pranga kanë rënë tre persona. Policia njofton se tre trafikantët janë ndjekur nga Durrësi dhe janë ndaluar në Tiranë.
Gjatë kontrollit të ushtruar në automjetin e tyre janë gjetur dhe sekuestruar rreth 5 kg lëndë narkotike e llojit heroinë.
Operacioni është zhvilluar një ditë më parë ku fillimisht u raportua për 10 kg heroinë të kapura pranë zonës së Saukut.
Njoftimi i policisë
Durrës
• Operacioni “Vollga”, goditet një grup që ushtronte aktivitetin kriminal në fushën e trafikimit të drogave të forta
• Sekuestrohen lëndë narkotike, vlera monetare, automjete dhe aparate celularë
Specialistët për Hetimin e Narkotikëve në Drejtorinë Vendore të Policisë Durrës në bashkëpunim me Prokurorinë e Rrethit Gjyqësor Durrës, pas një hetimi disa mujor me metoda speciale kanë finalizuar operacionin e koduar “Vollga”.
Në kuadër të këtij operacioni, nga Seksioni për Hetimin e Narkotikëve në DVP Durrës dhe Forca e Posaçme Operacionale në Policinë e Shtetit janë arrestuar në flagrancë 3 shtetas: B.D., A.T, dhe N.M. U ekzekutua gjithashtu, urdhri i Prokurorisë së Rrethit Gjyqësor Durrës për ndalimin e shtetasit A. R.
Specialistët për Hetimin e Narkotikëve në DVP Durrës, në bashkëpunim me Forcën e Posaçme Operacionale në PSH, pas ndjekjes dhe mbajtjes nën vëzhgim, kapën në flagrancë në Tiranë 3 shtetasit me rreth 5 kg të dyshuar heroinë, si dhe sasi monetare, 3 automjete e disa telefona.
Vijon puna për dokumentimin e personave të tjerë të përfshirë në këtë aktivitet kriminal. Materialet i kaluan Prokurorisë së Rrethit Gjyqësor Durrës, për veprime të mëtejshme për veprën penale “Prodhimi dhe shitja e narkotikëve, kryer në bashkëpunim”.
a.cupaj
