Volkswagen ka regjistruar një rënie të re të fitimeve, duke ulur margjinën operative në nivelet më të ulëta që nga periudha e errët e skandalit Dieselgate.
Në vitin 2025, fitimi operacional është gjysmuar, duke arritur në 8.9 miliardë euro krahasuar me vitin e mëparshëm. Si pasojë, prodhuesi më i madh europian i automjeteve ka njoftuar 50 mijë shkarkime deri në vitin 2030, shkruan La Repubblica.
Ndërsa vitin e kaluar pati 35 mijë shkarkime, kryesisht në markën VW. Këtë herë shkarkimet do të shpërndahen edhe në Audi, Porsche dhe prodhuesin e softuerit Cariad. CEO-ja, Oliver Blume, e ka përshkruar planin si një “plan transformues” të kursimeve që do të prekin çdo sektor të kompanisë.
Një nga faktorët kryesorë që vazhdon të rëndojë mbi Volkswagen është Kina. Pas viteve me fitime rreth 4-5 miliardë euro, në 2025 ato ranë nën një miliard, duke arritur në 958 milionë euro. Analisti i Metzler, Pal Skirta, komentoi se “testi kyç për VW do të jetë në 2027, kur do të kuptohet nëse ofensiva e re e markave mund të rikthejë pjesë të tregut në Kinë”. Për këtë vit, Volkswagen planifikon të prezantojë 20 modele të reja, me shpresa kryesisht tek Polo e re elektrike.
Rënia e fitimeve të Volkswagen është përkeqësuar nga kostot e larta të konvertimit të Porsche drejt elektrikëve, që kanë kushtuar 5 miliardë euro. Fitimi operacional i markës luksoze ra në 90 milionë euro, nga 5.3 miliardë euro vitin e kaluar. Një tjetër faktor është politika e tarifave amerikane, ndërsa tani shtohet edhe konflikti në Lindjen e Mesme.
Blume vuri në dukje se kjo është një zonë e rëndësishme për markat premium të grupit Porsche, Audi dhe Lamborghini dhe pritet që lufta në Iran të ndikojë edhe këtu, edhe pse ende është herët për ta vlerësuar saktësisht. Vitin e kaluar, eksportet e makinave luksoze drejt Afrikës dhe Lindjes së Mesme u rritën me 10%, por 421 mijë automjete të shitura aty përbënin vetëm 5% të totalit.
