Policia e Korçës ka ekzekutuar urdhrin e ndalimit për drejtorin e një filiali të nje bankë të nivelit të dytë në Bilisht, Ervin Çekani pasi dyshohet se ka përvetësuar një shumë prej 945 mijë euro.
Sipas njoftimit të Policisë, mësohet se Çekani u prangos pas një hetimi intensiv të prokurorisë, që lëshoi një urdhër arrest, të pranuar dhe nga Gjykata e rrethit në fjalë, pasi Çekani dyshohet se ka kryer transaksione antiligjore në dëmë të 25 klientëve.
Sipas policisë, mbi bazën e materialit kallëzues të dërguar nga banka, më datë 02.02.2015 ka regjistruar procedimin penal të vitit për veprën penale të “vjedhjes së bankës” dhe “falsifikimit të dokumenteve”.
Në këtë degë të bankës gjatë periudhës 01.11.2005-shkurt 2015 (rreth 10 vjet), në pozicionin e drejtorit të degës së bankës ka qenë shtetasi Ervin Çekani, i cili ditët e fundit është pezulluar nga funksioni, pasi banka është vënë në dijeni të veprimeve të parregullta në degën e qytetit të Bilishtit, nëpërmjet ankesës së klientit të saj S.D.
Redaksia Online
(Javanews.al)
