Policia e Vlorës ka bërë të mundur arrestimin e tre personave ditën e djeshme të cilët akuzohen për vjedhje të disa bagëtive në këtë qytet.
Blutë e Vlorës bëjnë me dije se në pranga janë vënë Barjam Xhelaj, 61 vjeç, Ilir Meraj, 38 vjeç, të dy banues në Vlorë si dhe Gëzim Shahaj, 63 vjeç, banues në fshatin Peshtan, Fier.
Siç bëhet ditur në njoftim, në fshatin Mërtiraj, Njësia Administrative Vllahinë – Bashkia Selenicë, gjatë natës, ata kanë vjedhur 11 lopë në stallën e P.I., 34 vjeç, me banim në këtë fshat.
Në bazë të hetimeve të kryera, ka rezultuar se të tre personat e arrestuar, në bashkëpunim me njëri-tjetrin pasi kanë vjedhur krerët e lopëve, i kanë transportuar ato me ndihmën e automjetit tip Furgon me targë AA 309 GJ në pronësi të Ilir Meraj, duke i strehuar në një vend të posaçëm pranë banesës së Gëzim Shahaj në fshatin Peshtan të Fierit.
Policia ka gjetur një pjesë të gjësë së gjallë (8 krerë lopë) si dhe ka bllokuar mjetin tip Furgon.
Materialet iu referuan Prokurorisë për veprën penale “Vjedhja e kryer në bashkëpunim” dhe “Përvetësimi i parave ose mallrave që rrjedhin nga vepra penale ose veprimtaria kriminale”. /b.d
