Gjykata e Tiranës ka lënë në burg Saimir Koroshin i cili u arrestua dy ditë më parë si i dyshuar për grabitje në Kamëz bashkë me një person tjetër. Gazetarja e Klan News Glidona Daci bën me dije se dy të rinjtë u identifikuan pasi një kamera filmike fiksoi makinën e tyre.
35-vjeçari Saimir Karoshi dhe bashkëpunëtori i tij Qatip Hoxha 32 vjeç vodhën me armë mbrëmjen e 1 Prillit në një servis në Bathore. Arrestimi i 35-vjeçarit u bë i mundur dy ditë më pas, ndërsa Qatip Hoxha u shpall në kërkim.
Të dy të rinjtë i vodhën pronarit të biznesit orën e dorës dhe varësen që kishte vënë duke e kërcënuar me armë zjarri. Këtë të Mërkurë, Daci raporton se në dëshminë e tij para trupës gjykuese, Karoshi ka thënë se ka qëndruar vetëm në makinë, duke ia lënë kështu autorësinë e grabitjes, shokut të tij. Qatip Hoxha i cili është ende në kërkim, është nipi i Rruzhdi Hoxhës që u vra dhe u gropos më pas nga shoku i tij Fredi Rrushi.
Kujtojmë se gjatë kontrollit në banesat e autorëve të dyshuar, janë gjetur dhe sekuestruar në cilësinë e provës materiale: 3 ora dore, 2 varëse dhe 2 byzylykë floriri, me vlerë të konsiderueshme, të dyshuara të vjedhura, një sasi municioni luftarak, një aparat celular dhe automjeti që dyshohet se kanë përdorur autorët për t’u larguar pas vjedhjes.
/a.r
