Nga qyteti i Vlorës, Deputeti Koço Kokëdhima ka akuzuar kreun e PBDNJ-së Vangjel Dule për tradhëti ndaj minoritetit grek dhe himariotëve, duke i kthyer kështu përgjigje për akuzat e bëra ditën e djeshme nga dega e kësaj partie, se deputeti socialist po prish ndërtime për të ngritur disa pallate pa leje. Deputeti socialist Kokëdhima tha se fati i Dules është i merituar, që të qëndrojë në një stan me Sali Berishën, për të cilin socialisti pati një sërë akuzash. Kokëdhima i ka kujtuar Dules se mandati i tij është falë Partisë Socialiste.
“PS nuk duhet të mbështesë përfaqësues të focave të tjera politike. Dua të shpreh mirënjohjen për mbështetësit tanë e minoritarët në Dropull e në jug të vendit. Populli shqiptar ka jetuar në vëllazëri me minoritetin greke. PS dhe kryeministri edhe me reformën territoriale dëshmuan respektim të minoritetit. Në këtë reformë Dulja ishe në një zë me qarqet shoviniste. Sipas tij, cenonte minoritetin grek. Dje Dulja tha se po prishen ndërtimet e minoritetit. Por bëhet fjalë për 3 familje shqiptare. Himara nuk ka qenë kurrë tokë greke dhe nuk ka jetuar kurrë një minoritet greke. Lefter Çipa e çarmatosi Dulen. I tha ‘Dule ne jemi këtu qysh para se të vinte deti’. Shpifjet e Dules ndaj meje nuk e ndryshojnë fatin e tij politik. Unë jam shqiptar, himarjot. Dulja e tradhtoi minoritetin dhe Himarën. Ndaj në 2015 e sikterisën partinë e Dules. Sot ka vendin që meriton, është në një stan me Saliun. Partinë e tij do e tresim më keq se partinë e Dules. Saliu përfaqëson shkatërrimin e vendit dhe gjërat më të këqija që kanë ndodhur në Shqipërinë. Plak i përdalë. Njeri u shthurur mendërisht dhe moralisht.”- tha Kokëdhima.
PS ka thirrur këtë të premte anëtarësinë e rajoneve të Vlorës e Gjirokastrës, ku do të jepen edhe kartat e reja të anëtarësimit për shumë të rinj socialistë. Koço Kokëdhima tha se Partia Socialiste e Vlorës dhe e Gjirokastrës do të shkojë në kongres më 19 mars, 3 herë më e madhe se sa në fillim të kësaj reforme.
