Prej kohësh nëpër qytete të ndryshme të Shqipërisë dalin të moshuar, burra, gra dhe të rinj të cilët ndalin qytetarë në rrugë për tu kërkuar lëmosha nën justifikimin e “familjarëve” të supozuar të sëmurë.
Pikërisht një gjë e tillë i ka ndodhur edhe një të riu në Vlorë. Ai quhet Elton dhe para disa ditësh është përballur me dy vajza, të cilat e kanë ndaluar dhe i kanë kërkuar para për nevojë emergjente.
Disa ditë më pas Eltoni zbulon mashtrimin e tyre dhe vendos ta denoncojë pranë JOQ. Ja çfarë ka shkruar ai:
Përshëndetje Jeta Osh Qef! Jam Eltoni nga Vlora. Sapo kalon vendin e quajtur Uji i Ftohtë në Vlorë (ish disko Shpella), të gjithë vlonjatët e dinë ku ndodhet. Para 10 ditësh ishin 2 vajza me dosje në dorë me 2 foto të një vajze të sëmurë. Ato më ndaluan dhe më kërkuan ndihmë për kushërirën e tyre. I kam dhënë 20 mijë lekë të vjetra sepse më erdhi keq. Gjithashtu dhe dy miq të mi që kaluan aty, u kishin dhënë para. Sot kur kalova prapë në këto momente, ishin prapë vajzat, por ishin shtuar dhe dy të tjera, të cilat siç duket duan të zhvasin qytetarët nën justifikimin e sëmundjes sepse fjalët e tyra janë njëlloj. Po u shkruaj tani juve që të gjithë ta marrin vesh përpara se të digjen si puna ime. Ju lutem publikojeni dhe nuk dua të jem anonim.
