Real Madridi ka supremacinë e madhe ndaj Atletico Madridit – natyrisht supermaci kjo në aspektin financiar.
Real Madridi njihet si ekip që investon shumë dhe marrë parasysh vlerën e klubit, kjo nuk është ndonjë risi.
Por, ky dallim është mjaft i madh kur mbretërit krahasohen me investimet që bën Atletico.
“Dallimi mes nesh dhe Real Madridit e Barcelonës është 400 milionë euro – por buxheti zhduket në momentin që gjyqtari i fryen bilbilit. Zemra është e barabartë ndaj dallimit të buxhetit mes nesh”, potencoi kohë më parë Simeone në vigjilje të finales ndaj Real Madridit.
Se Simeone ka arritur të instalojë mentalitetin luftarak në ekipin e tij është pa dyshim dëshmi suksesi i arritjes në finale për herë të dytë në tri vitet e fundit.
Ekipi aktual i Real Madridit është blerë për plot 559.35 milionë euro, teksa paramendoni Atletico ka shpenzuar vetëm 166.21 milionë euro për të krijuar ekipin që ka aktualisht.
Thënë më qartë, Vetëm Ronaldo dhe Gareth Bale i kanë kushtuar Real Madridit më shumë se sa krejt përbërja aktuale e Atletico Madridit.
Kjo, nuk është e tëra.
Real Madridi ka pasur aq shumë kapacitet financiar, sa që të mbajë 13 lojtarë nga finalja e fundit në Lisbonë, teksa Atletico ka vetëm gjashtë lojtarë nga finalja e kaluar, duke shitur e më pas blerë lojtarë për kosto krejt të ulëta.
Në letë, për Atleticon sfida ndaj Real Madridit duket krejt e pamundur.
“Më i miri nuk fiton gjithmonë, por ata që luftojnë dhe që janë të sigurt për atë që po bëjnë”, tha Simeone.
Reali është ekipi me më së shumti para në botë, por Atletico Madridi është klubi që më së miri ia di vlerën parasë. /Telegrafi/a.m.
