Presidentja e Kosovës, Vjosa Osmani u takua të shtunën në Mynih, me Komandatin Suprem të Forcave Aleate për Evropë (SACEUR) në NATO, gjeneralin Christopher Cavoli.
Presidentja Osmani e cila po ndjek punimet e konferencës së Sigurisë, ka vlerësuar rolin e NATO-s në këto 23 vite, që sipas saj, është i pazëvendësueshëm për Kosovën.
Në një postim në rrjetet sociale, presidentja Osmani thotë se në këtë kohë përcaktuese për kontinentin evropian, “riafirmova përkushtimin e institucioneve të Republikës së Kosovës për një bashkëpunim të ngushtë me aleancën, duke kontribuar aktivisht në sigurinë e rajonit dhe më gjerë”.
Më poshtë postimi i plotë
Në Konferencën e Sigurisë në Mynih, pata një takim të frytshëm me Gjeneralin Christopher Cavoli, Komandantin Suprem të Forcave Aleate për Evropë (SACEUR) në NATO.
Diskutuam mbi rolin e pazëvendësueshëm të NATO-s në Kosovë gjatë 23 viteve të fundit në mbrojtje të sigurisë dhe stabilitetit. Në këtë kohë përcaktuese për kontinentin evropian, riafirmova përkushtimin e institucioneve të Republikës së Kosovës për një bashkëpunim të ngushtë me aleancën, duke kontribuar aktivisht në sigurinë e rajonit dhe më gjerë.
