Presidenti amerikan, Barack Obama do të fillojë nesër një vizitë triditore historike në Kubë, vizitë që vetëm pak më shumë se një vit më parë do të tingëllonte e pamundur.
I vetmi president amerikan që ka vizituar Kubën është Calvin Coolidge, i cili shkoi me anije në këtë ishull, në vitin 1928.
Tashmë, dekadat e armiqësisë për shkak të spektrit ideologjik duket se kanë marrë fund.
Madje, edhe e përditshmja ”Granma” e Partisë Komuniste të Kubës, që për dhjetëra vjeçarë të tërë ka mallkuar Shtetet e Bashkuara të Amerikës si armikun kryesor të vendit, i referohet Obamës me terma miqësore.
Gjatë presidencës së tij, Obama nuk ka luajtur një rol shumë aktiv në Amerikën Latine, dikur e konsideruar si oborri i SHBA-së.
Sidoqoftë, mbërritja e Obamës në Kubë me avion përbën një hap të jashtëzakonshëm përpara.
”Me vizitën e tij Obama po dërgon mesazhin se ditët e armiqësive kanë marrë fund”, sipas Michael Shifter, president i institutit ”Inter-American Dialogue”.
Ndërkohë, për presidentin kuban, Raul Castro, kjo vizitë është kulmi i procesit të njohjes ndërkombëtare në rritje të Kubës.
Shumë shtrëngesa të llojeve të ndryshme janë hequr tashmë në Kubën komuniste. Restorantet private po shtohen dhe po bëjnë biznes të mirë, ndërkohë që represionet janë hequr. Fjalitë e shkruara nëpër mure, përfshirë frazën “Socializëm ose vdekje” duket se i përkasin një epoke të kaluar.
Në numrin e saj të fundit, revista britanike ”The Economist” tregonte me anë të një vizatimi Obamën duke pirë një puro që quhej ”Cubama”
ATSH
