Qyteti i Guayakilit në Ekuador ka tërhequr vëmendjen globale, pasi situata pandemike doli jashtë kontrollit, ku vdekjet kanë arritur shifra alarmante, që as agjencitë funerale nuk mundën t’i përballojnë.
Shumë trupa të viktimave prej Covid-19, u lanë të pagrumbulluar, disa të tjerë i varrosën pas kopshtit të shtëpisë, e disa kishin përfunduar nëpër rrugët e qytetit.
Autoritetet policore kanë mbledhur në tre ditë rreth 150 trupa të viktimave nga rrugët dhe shtëpitë e banorë në Guajakil. Ata paralajmërojnë se rreth 3 500 njerëz mund të vdesin nga virusi në qytet dhe në krahinat përreth në muajin e ardhshëm, nëse nuk zbatohen rregullat.
E gjithë vëmendja nga mediat mbarë globale erdhi pas publikimit në rrjetet sociale të videove nga banorët, ku shfaqen trupa të braktisur nëpër rrugët e qytetit.
Autoritetet nuk kanë konfirmuar ende se sa është numri i viktimave nga koronavirusi. E pas krizës së Covid-19 qyteti i Ekuadorit është goditur nga një tjetër kizë, ajo e mungesës së arkivoleve.
Rosa Romero, një 51-vjeçare humbi burrin e saj dhe u desh të priste një ditë që autoritetet të hiqnin trupin e viktimës nga shtëpia.
Pasi kaloi një javë, ajo nuk e di ende se ku është trupi i bashkëshortit të ndjerë. Pasi u paraqit pranë zyrës mjekoligjore, ata u shprehën se e kishin çuar në spital, por pas verifikimeve viktima nuk ishte regjistruar askund.
/a.r
