Ditët e para të Janarit shtojnë edhe numrin e pacientëve të vegjël me viroza apo komplikacione të ndryshme shëndetësore. Sipas mjekes pediatre Anila Sevdari dominojnë kryesisht problemet në rrugët e frymëmarrjes, por edhe temperatura e lartë për disa ditë.
“Kemi një fluks të shtuar të virozave, veç atyre që ne kemi në vendin tonë por edhe ato që vijnë nga vendet përreth. Çfarë ndodh, në këto kushte më të prekurit, më të predispozuarit që të shfaqin shenja janë fëmijët. Rrugët e sipërme respiratore janë ato që vihen re të parat, me hundë, me kollë, me ndonjë dhimbje fyti, pastaj shoqërohen, nëse zgjat për disa ditë, edhe me dhimbje trupi, me temperaturë disa ditore, në rastet më të rralla mund të shkojë në infeksione të rrugëve të poshtme respiratore, siç operohen me bronkiolitin, bronikiti ose dhe bronkopneumonia”, tha Anila Sevdari.
Numrin më të lartë të pacientëve që kanë nevojë për ndihmën e mjekëve janë kryesisht fëmijët e çerdheve, por nuk mungojnë as më të rriturit.
“Më tepër ka qenë kjo grupmoshë, 1-3 vjeç, shkon dhe tek adoleshentët për shkak se janë më të pavarur, dalin më shpesh, kanë më pak kujdes për veten e tyre në drejtim të veshjes apo ushqimeve ose pijeve të ftohta që konsumojnë dhe kjo shoqëruar edhe me raste të fëmijëve adoleshentë që kanë pasur probleme infeksionet e fytit edhe me bronkit”, tha Sevdari.
Për të patur një imunitet sa më të fortë, specialistët rekomandojnë konsum të sa më shumë produkteve të stinës me vitaminat përkatëse.
“Frutat që kanë vitaminat siç janë mandarinat, portokallët, limoni apo edhe molla që është shumë e rëndësishme dhe e shëndetshme për fëmijët. Përveç ushqimit, këshilla që ne japim është që të jetë e mundur të evitohet çdo kontakt i panevojshëm në ambiente të mbipopulluara”, tha Sevdari.
Ndër të tjera, mjekët shprehen se nëse fëmija shfaq temperaturë të lartë duhet me patjetër konsulta me specialistin përkatës për të shmangur çdo komplikacion të mëtejshëm.
