Presidenti i Komitetit Olimpik Shqiptar tregon vështirësitë që hasin sportet sot për të mbijetuar por edhe indiferencën e shtetit, që sipas tij po ndryshon. Shqipëria është e prekur edhe nga problemi i dopingut, ndërsa pjesëmarrja në këtë olimpiadë është gati minore, me vetëm 5 sportistë, teksa Kosova ka 8 syresh…
Intervistoi Ben Andoni
Mund të thuhen shumë gjëra por Shqipëria do përfaqësohet me vetëm 5 sportistë në Olimpiadën e Rios 2016, por aman një gjë nuk do sqarohet asnjëherë: Pse kemi gjithnjë e më pak sportistë dhe shumë më tepër fjalë? Ç’ka do të thotë një ekip minor dhe madje edhe më i vogël se Kosova, që përfaqësohet me tetë sportistë syresh në Lojërat Olimpike braziliane. Për ish-mundësin e njohur kampion absolut Viron Bezhani, presidentin e KOKSH-it, politika e ndjekur për sportin se ka favorizuar asfare zhvillimin e tij, ndërkohë që ka ardhur një kohë tjetër. E megjithatë Z.Bezhani mendon se diçka po ndryshon te shteti që ka filluar të mendojë për sportet e tjera veç futbollit. Ndërkohë që nuk duhet harruar se Shqipëria po vuan edhe dënimin ndaj federatës së peshëngritjes duke e privuar me pjesëmarje të plotë ekipin e shtangistëve, që mund t’i sillnin ndonjë medalje. Gjithsesi problematika është më e thellë: “Problematikat e sportit janë të shumta. Ndër to rreshtojmë se: Infrastruktura sportive është në një gjendje të mjerueshme; Sporti në shkollë; Masivizimi, Fondet etj. Për shtetin duhet të jetë si strategji PJESËMARRJA E RINISË ME AKTIVITETE SPORTIVE dhe jo e një apo dy disiplinave të veçanta”, citohet Bezhani.
Ekipi Olimpik i Shqipërisë ka gjithnjë një përfaqësim të limituar sportistësh në aktivitetet olimpike, që me këtë rast tregon dhe nivelin e saj të sportit. Si e shpjegoni vështirësinë për të rritur pjesëmarrjen e saj në këto Lojëra?
“Duhet të kuptojmë se pjesëmarrja në Lojërat Olimpike është me kualifikim. Ne kemi mbi 8 vjet që fjala sport nuk dëgjohej më në asnjë zyrë shteti, nuk kemi pasur një strategji për ta zhvilluar sportin, ku të gjithë besoj e kuptojnë këtë ngërç institucional, sepse drejtuesit e mëparshëm, sportin e shikonin si një lojë dhe kurrë nuk kanë menduar dhe respektuar vlerat e sportit. Ndryshon tani kur sporti po vlerësohet, por kuptohet që rezultatet nuk mund të vijnë menjëherë. Ne duhet të pranojmë se numri i sportistëve në këtë olimpiadë ka qenë dhe më i vogël pas problemit të dopingut që kishim me Federatën e Peshëngritjes, e tashmë dihet se peshëngritja do marrë pjesë vetëm me një sportist e jo me ekip. Për mua si president, e rëndësishme është që gjërat po ndryshojnë, dhe ky është një sinjal i mirë për sportin, pasi po shohim disa projekte për sportin që ka qeveria”.
Shikohet që e gjithë vëmendja ikën për futbollin, madje edhe investimet. A duhej që shteti përveç premtimeve të vazhdueshme të ishte më realist në ndihmën për sportet?
“Ajo që thoni ju, është e drejtë pasi sytë janë drejtuar të Futbolli. Problematikat e sportit janë të shumta. Ndër to rreshtojmë se: Infrastruktura sportive është në një gjendje të mjerueshme; Sporti në shkollë; Masivizimi, Fondet etj. Për shtetin duhet të jetë si strategji PJESËMARRJA E RINISË ME AKTIVITETE SPORTIVE dhe jo e një apo dy disiplinave të veçanta”.
Cilët do jenë sportistët përfaqësues dhe ku prisni që të merrni diçka pozitive prej tyre?
“Sportistët përfaqësues për në RIO janë:
1.LUIZA GEGA atletike 1500m dhe 3000m me pengesa
2.IZMIR SMAJLAJ atletikë, kërcim së gjati
3.SIDNI HOXHA not 50 m
4-NIKOL MERIZAJ not 100 m
5-BRIKEN CALJA Peshëngritje 69 kg
Duke u bazuar te rezultatet e fundit, shpresojmë te sportistja e atletikës Luiza Gega si dhe të peshëngritësi Briken Calja”.
