Humb jetën një i moshuar nga koronavirusi në vend në orët e para të mëngjesit të sotëm, duke e çuar numrin e viktimave në Shqipëri në 25.
Po ashtu shtohen 19 raste të tjera të personave të infektuar nga koronavirusi, çka e çon numrin total të të prekurve në 494.
Zëvendësministrja e Shëndetësisë Mira Rakacolli bëri me dije se mëngjesin e sotëm ka ndërruar jetë në spitalin infektiv një pacient 90-vjeç nga Fieri, i intubuar prej 11 ditësh i cili vuante nga diabeti, astma bronkiale dhe hipertensioni.
Sakaq dje janë testuar 252 persona të dyshuar, mes tyre 44 janë personel shëndetësor.
Nga rezultatet e testimeve janë konfirmuar 19 raste pozitive me COVID-19, prej të cilëve 11 raste në Tiranë, 1 rast në Krujë, 1 rast në Korçë, 1 rast në Elbasan, 5 raste në Kukës mes tyre 1 personel shëndetësor.
Deri në këto momente janë testuar 4558 raste të dyshuara dhe prej tyre janë të konfirmuar pozitivë me COVID-19, 494 raste.
g.kosovari
