Vijon prej katër ditësh zjarri në malin e Dukatit duke djegur një sipërfaqe të konsiderueshme me kullota, pemë dhe bimësi, teksa në terren janë të gjitha strukturat për të lokalizuar zjarrin dhe mos lejuar avancimin e tij.
Për të inspektuar situatën ka shkuar edhe kreu i Agjencisë Kombëtare të Mbrojtjes Civile, Haki Çako. Ai u ka bërë thirrje të gjitha strukturave për të hetuar çdo rast të zjarrit. Sipas kreut të emergjencave 90% e tyre vendosen nga dora e njeriut, por hetimi përcakton nëse është i qëllimshëm apo jo, ndërsa dëmet janë të konsiderueshme.
Çako ka theksuar se te gjitha strukturat janë në terren duke nisur nga forcat zjarrfikëse, të mbrojtjes civile, por edhe pushteti vendor. Parku Kombëtar i Llogarasë për momentin nuk rrezikon, ka theksuar Çako. Sipas tij dhe helikopteri është në gatishmëri për çdo ndërhyrje të mundshme.
