Kryeministri Edi Rama ka vijuar edhe këtë të enjte takimet në kuadër të analizës që po bën në prag të fundvitit, si për kabinetin qeveritar, ashtu dhe për ecurinë e PS.
Gazetarja e Klan News, Klesiana Omeri thotë se përveç Gjiknurit në takim ndodhet edhe një pjesë tjetër e kabinetit qeveritar, duke qenë se gjatë ditës së djeshme takimet janë bërë me disa prej ministrave që kanë raportuar. Rama sipas gazetares ka zhvilluar një takim kokë më kokë me secilin prej ministrave dhe pjesa tjetër pritet që të vijojë analizën edhe ditën e sotme.
“Ndryshe nga dje kreu i qeverisë ka ftuar edhe Sekretarin e Përgjithshëm, Damian Gjiknuri lidhur me një afat në fakt që tashmë është tejkaluar. Bëhet fjalë për përgatitjen të gjithë sekretariatit, por edhe objektivat që kryeministri i kishte përcaktuar, që lidheshin edhe me përgatitjet për zgjedhjet e ardhshme”.
“Kryeministri Edi Rama dhe Damian Gjiknuri kanë paralajmëruar se do të bëhen edhe ndryshime në statutin e PS, pritet që të jetë fokusi i diskutimeve edhe kjo nismë e ndërmarrë nga socialistët. Gjithsesi përpara se të përcaktohen ndryshimet në statut të mbahet mbledhja e Asamblesë së PS, e cila në fakt do të duhet që të ishte mbledhur brenda vitit 2021. Gjithsesi pritshmëritë janë që të mblidhet në fillim të vitit të ardhshëm”, shprehet gazetarja.
Takimet e Kryeministrit Edi Rama po zhvillohen në një prej vilave qeveritare në zonën e ish-Bllokut. Ndërsa në orën 12:00 është përcaktuar edhe mbledhja e qeverisë.
/a.r
