Një oficer i rangut të lartë të policisë së Vietnamit u zgjodh sot në formë krejt të papritur në postin e presidentit të vendit, një nga postet më të rëndësishme të regjimit komunist të partisë së vetme në vend.
“Falenderoj sinqerisht Asamblenë Kombëtare për postin e ofruar”, deklaroi Tran Dai Quang gjatë ceremonisë së betimit, sipas shërbimit të shtypit të Parlamentit.
Quang 59 vjeçar u zgjodh në këtë post në janar nga partia komuniste, qendër e vërtetë e pushtetit në Vietnam. Ai përpara këtij funksioni ka mbajtur postin kyç të ministrit të Sigurimit Publik.
Kjo është hera e parë që një gjeneral i policisë zgjidhet në postin e presidentit në Vietnam.
Zgjedhja e tij konfirmon dominimin politik të konservatorëve, pas kongresit të PC-së të organizuar në muajin janar shënuar nga tensione të mprehta midis konservatorëve dhe reformatorëve.
Vietnami ndodhet aktualisht në tranzicion të plotë pas rizgjedhjes në janar të Sekretarit të Përgjithshëm të partisë komuniste, Nguyen Phu Trong, numri një në radhët e shtetit. Kryeministri reformator Nguyen Tan Dung e humbi këtë post dhe pasardhësi i tij pritet të zgjidhet javën e ardhshme.
