Pas hetimeve të kryera policia e Tiranës ka goditur një grup kriminal të përbërë prej 7 personash që kryenin vjedhje me dhunë në zonën e Liqenit Artificial. Policia ka nisur hetmin pas denoncimeve të shumta që ka marrë nga qytetarë të ndryshëm.
Të arrestuarit pritet të dalin sot para gjykatës, ndërkohë që Prokuroria i akuzon si përgjegjës të tre vjedhjeve me dhunë. Ata gjithashtu do të hetohen edhe për veprimtari të tjera kriminale pasi aktiviteti i tyre vazhdon prej kohësh.
Identiteti i të arrestuarve nuk bëhet i ditur për shkak të moshës së mitur të tyre. Sipas denoncimeve grupi i të rinjve shfytëzonte errësirën për të kreyer vjedhjet. Ata i ndalonin njerëzit në rrugë duke u bërë pyetje mbi rrugën, orën apo duke kërkuar çakmak për ndezjen e cigares.
Në vazhdim të rinjtë u vinin thikën në trup vajzave apo grave dhe kërcënonin partnerët e tyre duke u marrë paratë, celularët dhe sendet e tjera me vlerë. Ata nuk vepronin të shtatë njëherësh, pasi ndaheshin tre e nga tre për secilin episod të grabitjeve. Grupi, sipas hetuesve, kishte edhe një “drejtues”./shqiptarja.com/
