Policia e Fierit ka nisur hetimet pas një video të bërë virale në rrjetet sociale, ku shihej një luan duke kafshuar një burrë, rreth të 50-ve, në kokë. Sipas autoriteteve ngjarja ka ndodhur në fshatin Zharrëz, aty ku 52-vjeçari me inicialet A.H., mbante në shtëpinë e tij kafshën e egër.
“Në lidhje me një video të publikuar në rrjetet sociale, në të cilën shfaqet një kafshë e egër (luan) që kafshon një shtetas, specialistët për Hetimin e Krimeve të Komisariatit të Policisë Fier kanë kryer veprimet e nevojshme hetimore dhe procedurale për përcaktimin e përgjegjësisë dhe zbardhjen e rrethanave. Në përfundim të këtyre veprimeve u identifikua shtetasi që kishte në pronësi kafshën, A. H., 52 vjeç, banues në fshatin Zharrëz, për të cilin, pas konsultimit me prokurorin, nisi procedimi në gjendje të lirë për veprën penale “Shkelja e karantinës së bimëve dhe kafshëve”, pasi dyshohet se e ka mbajtur kafshën, në banesë, në kundërshtim me rregullat”, sqaron policia.
Më tej sqarohet se shtetasi A.H. ka deklaruar për hetuesit se kafshën e ka gjetur në rrugë, në Lushnjë, 6 muaj më parë, kur ajo ishte e vogël. 52-vjeçari pretendon se e ka mbajtur këlyshin e luanit në banesën e tij, për disa kohë.
Ai po ashtu ka deklaruar se para 1 muaji e gjysmë, kafsha ka ngordhur dhe videoja që u bë virale në rrjetet sociale pretendohet të jetë e vjetër.
