Të paktën 1000 tonë naftë kanë përfunduar në det pasi anija naftëmbajtëse japoneze “MV W akashio” u ça pas përplasjes me një barrierë koralore, duke shkaktuar një katastrofë të vërtetë ekologjike në vendin e njohur jo vetëm për plazhet me ujë të kristaltë, por edhe pyjet dhe speciet në rrezik zhdukjeje që mban.
Përpjekjet për të stabilizuar anijen e përplasur që më 25 korrik janë ta vazhdueshme. Ndërkohë Japonia do të dërgojë ekspertët e saj për të ndihmuar autoritetet vendase, ndërsa një anije ushtarake franceze është afruar në zonë për të dhënë kontributin e saj. Deri më tani janë shpëtuar më shumë se 4000 tonë naftë, por fatkeqësisht 1000 tonë kanë përfunduar në det, duke ndotur ambientin përrallor.
Sa i përket kësaj çështje, pesidenti i kompanisë detare që ka në pronësi anijen, Akihiko Ono, u shpreh për mediat në Tokio se do të bëjë gjithçka për të riparuar dëmet, por ambientalistët thonë se është tepër vonë.
Ndërsa kryeministri i vendit, Jugnauth mblodhi qeverinë ditën e djeshme pasi grupet ambientaliste shprehën shqetësimin se dëmi mund të jetë fatal për bregdetin e ishullit.
