Kryeministri Rama ka vizituar në spitalin ushtarak njërin prej të sëmurëve që mbeti i bllokuar për 40 minuta në trafik gjatë protestës së opozitës ditën e djeshme. Një 61-vjeçar nga Fieri mbeti i bllokuar tek sheshi “Shqiponja” për mbi 40 minuta dhe protestuesit nuk i hapën rrugën. Ajo që bën çudi është se një nga organizatorët e protestës së opozitës, shkoi tek ambulanca për verifikim nëse kishte vërtëte të sëmurë dhe pavarësisht rastit, sërish protestuesit refuzuan të hapin rrugën. Kryeministri u njoh me gjendjen e të sëmurit dhe dëgjoi edhe shqetësimin e bashkëshortes së tij. Gruaja e revoltuar thotë se ka kaluar një traumë dhe kritikoi bllokimin e rrugës nga PD. “Çfarë borxhi të kam që të vdesë burri rrugës”, thotë ajo me lot në sy.
“U vonuam atje në autostradë, gjithkush e do jetën, protesto, por rrugën lerë të lirë mos e zër, pse duhet të rri një orë unë. Cfarë borxhi të kam që të vdes rrugës, unë e kam lënë në gjendje stresi burrin, vetë kam kaluar një traumë. Hape rrugën, pse trë më vdesë njeriu mua në rrugë. Tensioni fluturoi, isha me doktorin, ai u bllokua në rrugë” tregoi ajo situatën para kryeministrit.
Mjeku që po merret me rastin thotë se pacienti është i shtruar në reanimacion. Kryeministri garantoi gruan se mjeket do të bëjnë çdo gjë që kanë mundësi. “Fali zot se s’dinë se ç’bëjnë”, shkruan Rama në videon e publikuar. “Të gjithë ata njerëz të zakonshëm që i’u përgjigjen thirrjes për të bllokuar rrugët, duhet ta shohin këtë video. Edhe të gjithë ata që nuk i’u përgjigjen thirrjes edhe pse janë anëtarë apo simpatizantë të PD-së, duhet ta shohin këtë video.Ndërsa gjithë atyre të tjerëve që ishin kundër bllokimit të rrugëve dhe do ta shohin këtë video, u lutem të mos mallkojnë të gënjyerit nga frikacakët e ngujuar në Çadër, po thjesht të mos e harrojnë atë që do të shohin“, shkruan kryeministri. I sëmuri Vladimir Sula 61 vjeç nga Fieri, ishte në gjendje të rëndë, por përfaqësues të PD kanë dyshuar për vërtetësinë e saj duke e menduar si një inskenim./javanews.al/c.a
