Mbrojtja Civile dhe Ndihma Humanitare e Bashkimit Evropian ka reaguar në rrjetin social “X” lidhur me situatën në Shqipëri, duke shprehur gatishmërinë për të ofruar mbështetje shtesë nëse lind nevoja.
“Kemi mobilizuar flotën e zjarrfikësve nga ajri për zjarret në Vlorë dhe Dibër. Jemi të gatshëm të ofrojmë më shumë mbështetje nëse është e nevojshme,” thuhet në postim.
Siç raportoi më herët edhe Ministria e Mbrojtjes, janë nëntë vatra aktive zjarri në vend dhe një në monitorim.
Kritike paraqitet situata në Dukat të Vlorës, ku thuhet se flakët po përparojnë drejt fshatit dhe Llogarasë e po ashtu te “Liqeni i Luleve” në Parkun Kombëtar të Lurës.
Në ndihmë për shuarjen e zjarrit në Vlorë kanë operuar edhe dy avionë “Canadair” të shtetit grek.
