Policia Bashkiake e mbështetur nga Forcat e Ndërhyrjes së Shpejtë kanë ndërmarrë një aksion gjatë natës duke bllokuar mbi 1 mijë shezlone dhe çadra pa leje në hapësirën publike në vijën bregdetare. Në operacion kanë qenë 150 forca policie.
FNSH ka kontrolluar disa biznese, ndërsa gjatë sekuestrimit të shezloneve ka hasur qëndresën e pronarëve të bizneseve të cilët nuk kanë pranuar t’i dorëzojnë objektet. Njëri nga personat që është konfrontuar me policinë ka qenë edhe Nikoll Marku, i cili ka qenë ish-kryetari i komunës i Velipojës, pasi policia bllokoi disa shezlone të biznesit të nipit të tij.
Në krye të operacionit ishte drejtori i policisë së Shkodrës, Vehbi Bushati dhe n/ drejtori ndërsa Nikoll Marku e ka akuzuar se kishte ardhur me urdhër politik, por ai u shpreh se mbërriti në Velipojë me kërkesë të bashkisë së Shkodrës për ta mbështetur. Pas debateve policia ka sekuestruar shezlonet, ndërsa operacioni do të vijojë edhe në biznese të tjera, që kanë zënë hapësirën publike në plazhin e Velipojës.
Debati në Velipojë gjatë natës për bllokimin e shezloneve
Nikoll Marku: Bashkia nuk është këtu, duhet të vijë bashkia përpara. O vëlla ju keni ardhur politikisht për të na rënë, ne partisë Demokratike, 50 vite kemi duruar, edhe 500 vite durojmë, edhe një vit durojmë, prapë se prapë do të jemi ne këtu, po ju?
N/ drejtori i Policisë Shkodër: Në këtë moment do të vijnë bashkia, kemi ardhur për t’i mbështetur, ja do i marr tani në telefon
Pronari i lokalit (nipi i Nikoll Markut): Kemi bërë një marrëveshje për t’i paguar të gjitha taksat
N/ drejtori i Policisë Shkodër: Ju mendoni se kam ardhur për qejf këtu, mua më ka sjellë bashkia këtu
Pronari i lokalit (nipi i Nikoll Markut): Është terrorizëm të vish me armë këtu
Nikoll Marku: Ti ke ardhur politikisht, këtu të vijë kryetarja, ke ardhur gabim, nuk fillohet në mes, por mare
I afërm i Markut: Unë kam nënshtetësinë shqiptare edhe për pak ditë, a mendoni se të gjithë këta kriminelë i kanë vendosur sot çadrat, nëse ju më jepni këtë përgjigje?
N/ drejtori i Policisë Shkodër: Këtë zgjidhe me shtetin
Nikoll Marku: Po kush është shteti këtu? Ju jeni shteti
Pronari i lokalit (nipi i Nikoll Markut): Po jemi duke punuar more burrë, nëse e bëni këtë veprim në maj dakord
Drejtori i Policisë së Shkodrës Vehbi Bushati: Unë do të bind ty, se jam në kohën e duhur. Ti i ke me gjak dhe me i mbajt me gjak dhe do të jesh njeri i respektuar nëse zbaton ligjin, nëse nuk e zbaton…
Pronari i lokalit (nipi i Nikoll Markut): Ligjin e kam zbatuar
Drejtori i Policisë së Shkodrës Vehbi Bushati: Po nëse keni zbatuar ligjin pse i mblodhët?
Pronari i lokalit (nipi i Nikoll Markut): I mblodha pasi e di se kush jeni ju
Drejtori i Policisë së Shkodrës Vehbi Bushati: Zoti Nikoll ka përfunduar koha, që unë unë apo ti të detyrojmë pa ligj, ka një kohë, unë veproj vetëm me ligj
Pronari i lokalit (nipi i Nikoll Markut): Po në 2 të natës vjen policia
Drejtori i Policisë së Shkodrës Vehbi Bushati: Ne kemi autorizim, shko ankohu ku të duash, ti ke hallin a do të jetë bashkia
Pronari i lokalit (nipi i Nikoll Markut): Po bashkia nuk ka ardhur
Drejtori i Policisë së Shkodrës Vehbi Bushati: Nëse jeni të paqartë, posta e policisë është atje, ju pres atje, ju që i keni sjellë këta njerëz
Nikoll Marku: Këta janë komshinj, janë turistë
Një qytetar: Ne jemi mbledhur për ditëlindje
Drejtori i Policisë së Shkodrës Vehbi Bushati: Edhe 100 të tjerë. Por pronari kush është?
Pronari i lokalit (nipi i Nikoll Markut): Unë jam
Drejtori i Policisë së Shkodrës Vehbi Bushati: Nëse je i paqartë, të të sqaroj në polici
Pronari i lokalit (nipi i Nikoll Markut): Nëse do të më arrestosh vij që tani, por nuk ke se cfarë më sqaron, a duhet të më sqarojë bashkia mua?
Nikoll Marku: Keni ardhur gabim, ku është bashkia? Që jeni në mbështetje të saj?
Tregtar: Nuk jam njoftuar si tregtar, kam bërë kërkesë që në 15 maj, por deri sot 11 korrik, asnjë nga bashkia e Shkodrës nuk ka ardhur, sivjet ma kanë zënë, nuk jam as i butë, por as i egër, ma kanë zënë me forcë, kryebashkiakja nuk ka ardhur për ta liruar
Drejtori i Policisë së Shkodrës Vehbi Bushati: Për këtë punë kemi ardhur
Tregtar: Po unë jam dëbuar, sot duhet të ishte një përfaqësues i bashkisë së Shkodrës këtu /ma.me
