Kryeministri Edi Rama vizitoi para disa ditësh një familje në Shijak, e cila jetonte në një banesë të shkatërruar.
Teksa vizitoi familjen e Hysen Zhupanit, Rama premtoi se shtëpia do të rindërtohej dhe mobilohej.
“Do shihemi shpejt besoj, para se të vijë dimri”, i premtoi ai familjes teksa tha, “Nuk e prisja kaq të tmerrshme”.
Por këtë të mërkurë, e cila përkon me ditën e shenjtërimit të Nënë Terezës, Rama ka dhënë lajmin e mirë.
“Në këtë ditë të bekuar të Nënë Terezës, e para fjalë që kujtoj prej saj, është fjala që më ndihmon shpesh në të përpjetat e të tatëpjetat e rrugës sime, ‘Më mirë të ndezësh një qiri, sesa të mallkosh errësirën”, shkruan Rama teksa publikon videon që gjeni më poshtë.
Në të shihet familja Zhupani duke u larguar nga banesa e tyre e vjetër, ku ministrja e Shëndetësisë, Ogerta Manastirliu i çon në shtëpinë e tyre provizore.
Ajo u bën me dije se tashmë kanë filluar punimet për shtëpinë e tyre të re, në mënyrë që të jetë gati para mbërritjes së dimrit.
Gjithashtu ajo ju dhuroi libra dhe çanta fëmijëve, duke iu uruar sezon të mbarë shkollor dhe suksese.
