Në Milano, tifozët kanë kaluar gjithë natën poshtë hotelit ku po qëndronte Gonzalo Higuain në pritje të vizitave mjekësore të futbollistit argjentinas dhe firmës së tij me Milanin.
Por Leonardo Bonuçi nuk e ka ndjerë një entuziazëm të ngjashëm në momentin kur ka shkelur sot në Torino për të rifilluar karrierën me Juventusin, pasi në aeroport nuk kishte dalë ta priste askush.
Mbrojtësi i larguar një vit më parë nga Juventusi u kthye në armikun e tifozerisë bardhezi e cila e vlerëson atë shpesh si tradhtar dhe kthimi i tij nuk është se ka lumturuar shumë mbështetës të kampionëve të Italisë.
Ndaj me siguri Bonuçi e priste një injorim të tillë në momentin kur doli nga aeroporti i Kazele, duke u folur vetëm pak gazetarëve e fotoreporterëve të pranishëm që ishin lajmëruar nga klubi për mbërritjen e tij.
Mbrojtësi udhëtoi nga SHBA ku la Milanin, për t’u kthyer në Torino dhe për të kryer sot vizitat mjekësore te “J-Medical”, para se të nënshkruajë kontratën e re me bardhezinjtë.
Të gjithë po presin me kureshtje të dëgjojnë konferencën për shtyp të mbrojtësit, i cili u largua si i pakënaqur një vit më parë dhe tani ka disa shpjegime për të dhënë se pse ndryshoi kaq shpejt mendje.
