Sali Berisha ka dënuar deklaratat e kryeministrit Edi Rama në Pejë për bashkimin e shqiptarëve në familjen europiane deri në vitin 2025. Sipas tij, deklaratat e shefit të qeverisë ishin antikombëtare, proserbe dhe kercenuim për BE-në. Ndërkohë, Berisha rezulton të ketë folur po me të njëjtën gjuhë në Shkup kur festohej 100 vjetori i pavarësisë së Shqipërisë. Ish kryeministri tha asaj kohe se BE dhe fqinjët nuk duhet të irritohen nga përpjekjet e shqiptarëve për bashkimin e tyre kombëtar.
“Ky 100 vjetor na fton, na frymëzon të vazhdojmë për të bërë realitet ëndrrën e atyre që u flijuan gjatë një shekulli për liri dhe dinjitet kombëtar. Ajo ëndërr në të vërtetë 1000 herë po ta lexosh, është ëndrra e bashkimit kombëtar të shqiptarëve. Këtu nga Shkupi dua t’ju bëj thirrje shqiptarëve. Të punojnë çdo minutë, çdo orë, çdo ditë, çdo javë, çdo muaj, çdo vit për bashkimin e tyre. U bëj thirrje fqinjëve tanë, përpiquni të kuptoni drejt bashkimin e shqiptarëve do të bëheni më të lirë, më të drejtë dhe shqiptarët janë të gatshme për një bashkëpunim miqësor, afatgjatë, shekullor. Shqiptarët e lirë do të jenë forcë kryesore zhvillimi për veten e tyre dhe rajoni”, deklaronte dikur Berisha. /ma.me
