Kryeministri Edi Rama u ka dhënë familjarëve të Anri Kashikut statusin ‘Dëshmor i Atdheut’. Rama tha se Anri nuk u bë hero vetëm i vëllait, por i të gjithë shqipatërve.
“Nuk ishte vetëm familja, të afërmit, miqtë shokët, komuniteti i zonës, ishte e gjithë Shqipëria që u prek me zemër dhe që me mendje qëndroi për një moment tek ky i ri që sikundër më tregoi babi kishte pasion futbollin.
Donte të bëhej një futbollist i mirë dhe i njohur dhe që nuk ia doli dot sepse rrethanat fati e vendosën. Ai u bë heroi i të vëllait, por edhe heroi i të gjithë shqiptarëve.
Përfitimi i këtij statusi të dëshmorit nuk e shuan pikëllimin e thellë të familjarëve, dhimbjen, por mbase lehtëson sado pak një plagë që fatkeqësisht do qëndrojë aty në zemrën e babit familjarëve vëllait dhe të afërmve.
Nga ana tjetër është një detyrim i yni që të nderojmë çdo shqiptar, në radhë të parë këta lloj shqiptarësh, njerëz të zakonshëm, babi i Anrit është një burrë punëtor në emigracion. Më tregoi se prinin të takoheshin, i kishte dhënë fjalën që do takoheshin, por këta e solli që të mos e takonte dot djalin por të kthehej në Shqipëri për ti dhënë lamtumirën e fundit.
Qeveria është zotuar që ti mbrojë fëmijët e të rënave kudo në Shqipëri, por në këtë rast Anri vetë ishte një fëmijë dhe asht si të tjerë heronjtë të këtyre ditëve edhe ai u bë një simbol i një vetëmohimi ekstrem për të përmbushur një mision që disave si mjekëve që humbën jetën gjatë pandemisë, ua sjell rruga, disa të tjerëve ua sjell thjesht një moment i gabuar që askush nuk e ka në dorë por që në atë moment të gabuar bëjmë heroikisht gjënë e duhur”, tha Rama.
Ndërkohë babai i Anrit me zërin që i dridhej, tha se dhimbja është e madhe, ndërsa uroi që kjo që i ndodhi atij, të mos i ndodh asnjë prindi.
“Kjo që më ndodhi mua nuk dua ti ndodhi asnjë në botë. Është një dhimbje që nuk ka fjalë. Falenderoj ty zoti Kryeministër që emri i Anrit të mos harrohet në të gjithë familjet e Kombit Shqiptar. Uroj që kjo që më ndodhi mua të mos i ndodh askujt.” tha babai i Anrit./m.j
