Kryeministri Edi Rama ka zgjedhur që urimin e Vitit të Ri, në vend të vetë urimit, të kërkojë ndjesë për një sërë grupesh sociale, qytetarëve, të moshuarve, grave të prekura nga dhuna në familje, të rinjve të papunë, të atyre që janë ndier të dhunuar nga padrejtësia në gjykata.
Rama e ka nisur fjalën e tij duke i kërkuar ndjesë të gjithë qytetarëve që janë përballur me padrejtësinë e shtetit si dhe atyre që iu është dashur të përballen me vendime gjyqësore të padrejta… por, ka shtuar Rama, viti i ardhshëm do të jetë më i mirë.
Madje, kryeministri i ka kërkuar ndjesë dhe familjes ë tij, duke thënë se në postin dhe detyrën e tij është shumë e vështirë të qëndrosh pranë familjes dhe njerëzve të dashur.
Në fund të fjalimit të tij, Rama ka uruar “shëndet majtas dhe djathtas”.
Pjese nga fjala e Rames
“Mirmbrëma të gjithëve dhe ndjesë kujtdo që është përballur me padrejtësinë e shtetit gjatë këtij viti që po ikën. Do të luftojmë edhe më shumë që shteti të jetë më i drejtë për të gjithë.
Ndjesë cdo shqiptari që ka rënë viktimë e pushtetit të korruptuar këtë vit. Jam i bindur që vitin që vjen do të jetë viti më i mirë për drejtësinë në këta 25 vjet dhe i pari i një zinxchiri vitesh që vijnë që do të garantojë më në fund drejtësinë e barabartë për të gjithë qytetarët.
Ndjesë cdo viktime të dhunës në familje që edhe këtë vit ka tronditur shoqërinë. Kjo dhunë mbetet një thirrje vazhdueshme për të bërë më shumë për shoqërinë…jo vetëm dhunës ndaj grave por edhe dhunës në përgjithësi që prek qorrazi, komunitetin rom, apo individët me orientim të ndryshëm seksual.
Ndjesë për të moshuarit e këtij vendi… kemi bërë aq sa kemi mundur… nuk do të reshtim asnjëherë për të bërë më shumë për ta.”-tha Rama./java/a.k
