Pas mbledhjes së jashtëzakonshme të qeverisë herët gjatë mëngjesit të sotëm, Kryeministri Edi Rama u ndal për të takuar banorët e prekur nga tërmeti.
“Askush nuk do të mbetet jashtë”, kështu u zotua Kryeministri, gjatë takimit që pati me banorët, banesat e të cilëve u shkatërruan apo dëmtuan nga tërmeti.
Ai tha se ka nisur procesi për ti dhënë strehim atyre që për shkak të tërmetit ose iu është shembur ose ju është bërë shtëpia e pabanueshme.
“Po bëjmë inventarin, në mënyrë që të mos vijnë ata që s’iu takon dhe duan të përfitojnë. Të gjithë ata do i akomodojmë në hotele. Do të bëjmë listën e njerëzve që janë jashtë, pastaj do të bëjmë riparimet”, deklaroi Rama.
Po ashtu ai tha se pas sistemimit në hotele, aty do të krijohen edhe kushtet për të krijuar klasa dhe të mos shkëputen nga mësimi.
