Kryeministri Edi Rama deklaron se Marrëveshja për Shengenin mes vendeve të Ballkanit Perëndimor iu vlen në radhë të parë njerëzve të thjeshtë, atyre që doganat dhe barrierat mes shteteve i detyrojnë të humbin orë të tëra në radhë, duke pritur për të kaluar anën tjetër të kufirit.
Përmes një video-mesazhi, Kryeministri Rama shprehet se “Shengeni Rajonal është për qytetarët dhe njerëzit e punës, jo për politikanët që nuk presin në radhë askund”.
Kjo është mbështetur edhe nga vetë zëri i qytetarëve, të cilët pohojnë se këto barriera doganore janë vërtet të tepërta.
“Kjo barrierë është e tepërt. Dogana është e tepërt,” shprehet një qytetare. “Çdo ditë presim një orë,” thotë një tjetër qytetar, i cili ndodhet në radhë, në pritje të kalimit të kufirit doganor. “Minimumi dy orë, dy orë e gjysmë, ndoshta më tepër,” shprehet një tjetër qytetar.
Sipas Kryeministrit Rama, Marrëveshja e Ballkanit Perëndimor do t’iu japë fund njëherë e mirë pritjeve të gjata në dogana dhe do krijojë liri lëvizjeje pa barriera për njerëzit, mallrat, shërbimet e kapitalet.
/a.r
