Kryeministri Edi Rama ka prezantuar këtë të premte, 18 korrik, pamjet e shkollës së re 9-vjeçare “Angela Merkel” në Kamëz, e cila do të hapë dyert në muajin shtator për mbi 1 300 nxënës.
Në një video të shpërndarë në rrjetet sociale, Rama tregon ambientet moderne të godinës arsimore, të cilat janë ndërtuar sipas standardeve europiane, tashmë të konsoliduara jo vetëm në pjesën më të madhe të shkollave në Bashkinë Kamëz, por edhe në rreth 400 shkolla të reja të ndërtuara në gjithë vendin.
“Mirëmëngjes, dhe me shkollën e re 9-vjeçare ‘Angela Merkel’ në Kamëz, e cila hap dyert në shtator për të pritur mbi 1 300 nxënës me standardet europiane tanimë të afirmuara si standarde në shumicën dërmuese të shkollave të kësaj bashkie, edhe të afro 400 shkollave të reja që kemi ndërtuar në mbarë vendin, ju uroj një ditë të mbarë”, shkruan kreu i qeverisë.
Shkolla “Angela Merkel” është pjesë e një transformimi të thellë të infrastrukturës arsimore në Kamëz dhe më gjerë, ku investimet në objekte të reja, moderne dhe funksionale synojnë të krijojnë kushte dinjitoze për edukimin e brezave të rinj.
