Zgjedhjet vendore mbaruan dhe Aleanca për Shqipërinë Evropiane i fitoi bindshëm pavarësisht pretendimeve të tjera të Partisë Demokratike. Ajo që bie në sy në fakt, ka të bëjë me akuzat që opozita ka ndaj mazhorancës, atë të blerjes së votave. Konkretisht PD akuzon LSI se ka blerë votat e qytetarëve në zgjedhjet vendore për disa bashki.
Por këto akuza janë të njëjta që opozita ngriti edhe në 2013, ku sërish mori një humbje të thellë. Në ndryshim nga dy vite më parë, këtë radhë PD i mungon deputeti i ndjerë Sokol Olldashi.
Faktikisht, dy vite më parë, do të ishte pikërisht Olldashi që do të fliste rreth fenomenit të blerjes së votës në Korcë, ku studentët paguheshin 2 mijë lekë të reja.
Në atë kohë deputeti demokrat tha se problemi është shumë më i madh pasi sipas tij tashmë blerja e votës është kthyer në sistem. Ai i bëri thirrje të dyja palëve, të reagonin duke vënë theksin edhe tek domosdoshëmria e largimit nga karrigia e deputetit për të gjithë të inkriminuarit.
Në atë kohë, për PD fjalët e Olldashit do të binin në vesh të shurdhër, pasi këtë fjalim mund ta kishte kthyer në kauzë, por nuk e bëri. Ajo humbi një vit e gjysëm kohë për të diskutuar dhe trajtuar fenominin e blerjes së votës.
Më pas PD do t’i rikthehej kauzës së dekriminalizimit, që në fakt ishte shtruar si problem pikërisht nga Olldashi në atë fjalim. Tashmë dy vite më vonë, duket se kauzat e PD janë në të vërtetë shqetësimet e Olldashit, dhe profecitë që ai bëri nga salla e parlamentit, por në atë kohë PD nuk e dëgjoi.
