Punonjës të armatosur të policisë kanë tërhequr zvarrë dy emigrantë shqiptarë gjatë një mësymje në një lavazh. Një video e publikuar nga mediat britanike ka marrë shumë kritika për mënyrën e trajtimit të emigrantëve. Video është marrë nga kamerat e sigurisë, në lavazhin në pronësi të Bashkim Ademit, në Worcestershire.
Policë të armatosur bastisën biznesin e shqiptarit, pasi kishin marrë informacion se punonin emigrantë të paligjshëm dhe ishte një bazë për armë dhe drogë. Në video duket se si dy të dyshuarit dalin nga dera, me duart në kokë. Po ashtu një nga oficerët tërheq zvarrë një emigrant shqiptar për gati 10 metra.
Sipas “Dailymail” një 26-vjeçar shqiptar është arrestuar, si i dyshuar se ka hyrë në Mbretërinë e Bashkuar në mënyrë të paligjshme dhe ai u dërgua në një qendër paraburgimi.
“DailyMail” e përshkruan si operacion dramatik në mes të ditës dhe në një zonë rurale të qetë. Policia gjithashtu kishe dyshime se në këtë biznes kryej pastrim parash. Pamjet e kamerave së sigurisë tregojnë se mësymja e policisë ka ndodhur më 28 nëntor në orën 8 të mëngjesit. Pronari i lavazhit, Bashkim Ademi thotë se nuk e ka zënë gjumi nga mënyra e trajtimit të dy punonjësve të tij.
“Policia na ka ardhur dhe dy herë të tjera dhe na kanë trajtuar si mbretër. Por këtë herë e trajtuan kështu stafin tim”, tregon ai.
“Nuk kam asgjë për të fshehur. Nëse do të kishte diçka nuk do të kontaktoja gazetat”.
Një britanik që po lante makinën, tha se ndihej i turpëruar nga kjo sjellje e policisë.
“Nuk më besohet se kjo ka ndodhur në vendin tim. Më bën të ndihem i turpëruar që jam britanik”, thotë Rod Canning.
“Ata u trajtuan si terroristë, por në fakt janë punëtorë siç edhe shihen në video.”
Nga ana e saj, policia e ka mbrojtur operacionin duke e quajtur “sukses”.
ma.me
