Ish-truproja e Sali Berishës Sali Lushaj dhe një person tjetër janë ndaluar në një operacion të befasishëm nga policia pranë stadiumit Dinamo.
Forcat “Shqiponja’ kanë ndaluar dy mjete ‘Mercedes-Benz’ që udhëtonin njëri pas tjetrit. Fillimisht blutë kanë ndaluar drejtuesin e mjetit Lushaj e pak çaste më pas nga mjeti del edhe një person tjetër i cili gjithashtu është ndaluar.
Më pas nga mjeti që drejtohej nga Lushaj, del dhe një person tjetër që qëndronte në sediljen e pasme, por nuk kemi mundur ta identifikojmë. Të dy makinat janë kontrolluar imtësisht nga shërbimet e Bluve të Tiranës dhe më pas janë shoqëruar në ambientet e Drejtorisë së Policisë.
Ngjarja ka ndodhur rreth një orë më parë, rreth orës 15.30 dhe nuk dihet se për çfarë bëhet fjalë. Të dy makinat Mercedes Benz janë shoqëruar nga Policia në ambientet e Drejtorisë së Tiranës.
Shkaqet e ndalimit të Lushajt dhe shoqëruesit të tij nuk dihen ende./m.j
