Prej 15 vitesh banorët e një ndër fshatrave më të mëdhenj të Bashkisë së Fierit, atij të Shtyllasit, vuajnë mungesën e ujit në banesat e tyre.
I njohur në kohën e monizmit si fshati i internimeve, pasi në këtë zonë internoheshin familjet nga veriu dhe verilindja e vendit që deklaroheshin si kundër ish-sistemit komunist, edhe gjatë viteve të demokracisë kjo damkë këtij fshati i ka mbetur, por duke i lënë pa ujë.
Banorët tregojnë vështirësitë që u shkakton mungesa e ujit të pijshëm: “Kur ka qenë burgu këtu, ka pasur ujë. Ne kemi hapur puse vetëm për të larë e për të shpëlarë. Për të pirë, e blejmë. Kush ka makinë, shkon e mbush larg”.
Në lidhje me këtë situatë, Drejtoria e Ujësjellës – Kanalizimeve Fier bën me dije se gjatë periudhës së transferimit të ujësjellësve nga ish-komunat te ujësjellësi qëndror, ujësjellësi i Levanit që mbulon edhe fshatin Shtyllas, ka qenë jofunksional dhe nuk është transferuar si aset, ndaj gjatë këtyre viteve nuk ka qenë në administrim të ujësjellësit të Fierit asnjëherë.
Një handikap ky që është premtuar se do të zgjidhet gjatë vitit 2025, në studimin dhe projektimin e të gjitha linjave të ujësjellësit.
