Djali 15-vjeçar i Arjet Saitit, dyshohet të ketë parë gjithë ngjarjen nga kamerat e sigurisë që ndodheshin të instaluara në lokalin që kishte marrë me qira babai i tij. Mësohet se kamerat ishin të lidhura me një laptop që ndodhej në shtëpinë e Saitit, dhe aty dyshohet se minoreni ka arritur që të shohë se çfarë ka ndodhur.
15-vjeçari është shokuar, pasi ka parë se si është ekzekutuar i ati. Ndërkaq, mësohet se pamjet e kamerave të sigurisë janë sekuestruar nga policia dhe po përdoren për të bërë të mundur zbardhjen e plotë të ngjarjes së rëndë në njësinë Dajç.
SI NDODHI VRASJA
Mbrëmjen e së hënës, Miklovan Parubi ka qenë në lokal duke luajtur poker me shoqërinë e tij, por jo me shuma të mëdha. Në lojë e sipër ai është konfliktuar me shokët, ndaj është larguar nga lokali. Më pas ai është kthyer i armatosur me një automatik në lokalin ku gjendeshin 10 persona. Sapo ka hyrë brenda, Parubi ka thënë ‘do ju vras të gjithëve’, ndërsa ka qëlluar me breshëri. Për pasojë kanë mbetur të vdekur pronari i lokalit, Arjet Saiti, 42 vjeç dhe Gacalin Kopshti, 30 vjeç. Sipas hetuesve të çështjes, Saiti ka tentuar t’i marrë armën Parubit duke i thënë se ‘çfarë po bën’, por ky i fundit e ka qëlluar për vdekje.
Ndërsa, mësohet se Gacalin Kopshti është vrarë aksidentalisht, pasi ai më përpara kishte qenë duke zënë peshk dhe më pas ka shkuar për të takuar të vëllain në lokal. Nga breshëria e plumbave janë plagosur shtetasit Aleks Prendi, 40 vjeç, Vinçens Kopshti, 26 vjeç, Ndok Marku, 35 vjeç si dhe Kitas Molla, 26 vjeç. Personat e tjerë që ndodheshin brenda lokalit dhe që shpëtuan nga plumbat nuk kanë kuptuar se çfarë ka ndodhur, por kanë njoftuar menjëherë forcat e policisë, të cilat kanë mbërritur në vendngjarje dhe kanë rrethuar zonën. Pak orë pas ngjarjes, policia vuri në pranga 33-vjeçarin Miklovan Parubi.
DESHMIA E AUTORIT
Edhe pse ka shkaktuar një masakër të vërtetë, duke vrarë dy persona dhe plagosur katër të tjerë pas një sherri në lojën e pokerit, Miklovan Parubi nuk ka shfaqur shenja pendese për krimin e rëndë që ka kryer. Kur është marrë në pyetje nga policia, ai ka thënë: “Po, unë kam qëlluar. Pas sherrit, kam hyrë në lokal me automatik, kërkova t’i veçoja ata që kam dashur të qëlloj, por ata nuk u ndanë dhe qëllova mbi të gjithë. Më vjen keq vetëm për tre të plagosurit, se me ata nuk kam pasur punë. Ma bënë për borxh, ka kohë që ma kishin bërë për borxh dhe mbrëmë nuk durova më”. Kjo ka qenë deklarata befasuese dhe e ftohtë që ka bërë para forcave të policisë i arrestuari. Duke njohur çrregullimet e tij emocionale, policia ka krijuar bindjen se 33-vjeçari i ka kryer të gjitha veprimet ashtu siç i deklaron.
BASHKEPUNETORI
33-vjeçari Miklovan Parubi nuk ka qenë i vetëm në vendin e ngjarjes. Autori i vrasjeve dhe plagosjeve ka bashkëpunuar me Marçel Shpijatin. Ky i fundit, sipas burimeve nga vendngjarja e ka ndihmuar autorin për të gjetur armën kallashnikov, me të cilën më pas ka kryer edhe krimin e rëndë duke qëlluar mbi shokët e tij./Balkanweb/a.m.
