Majlinda Bregu parashikoi humbjen e thellë të zgjedhjeve thuajse 1 vit më parë.
Një nga zërat më kritik ndaj bashës, prej kohësh ngulmonte se rruga e ndjekur nuk ishte e duhura dhe në fund ajo u la jashtë listave të kandidatëve. Ish-ministrja e integrimit në këtë emision fliste pas humbjes së PD-së në bashkinë e Dibrës.
Bregu deklaronte se nëse PD nuk reflektonte për këtë parti do ndodhte një tragjedi. Dhe ja rezultati tregoi se PD u shkërmoq në zgjedhjet e së dielës.
Majlinda Bregu, 19 shtator 2016
Sot ne kemi nevojë për të dëgjuar secilin prej anëtarëve të PD, përndryshe në rast se ne nuk do të shohim nga vetvetja, në rast se nuk do të kemi kërkesën e llogarisë dhe sinqeritetin me veten, alarmi i Dibrës mund të jetë një tragjedi më e madhe në 2017. Nuk është tragjedi humbja e zgjedhjeve lokale në Dibër. Është humbje dhe humbëm, por nuk është tragjedi, tragjedia mund të ndodhi në rast se ne nuk e shohim veten dhe nuk fillojmë të mendojmë për problemet qysh sot dhe sigurisht ka mënyra sesi mund ta bëjmë këtë.
Aso kohe Bregu dha edhe mendimin e saj se si mund të ndalej korrupsioni me votën, që në fakt u pasqyrua në marrëveshjen Rama-Basha duke forcuar ndëshkimet.
“Unë jam një nga të paktët njerëz që besoj se me ligj mund t’i ndalësh dorën korrupsionit me votën. Për të mos i shkuar asaj skemës që është e mirëqenë dhe është gjithmonë në fuqi: ku duhet të paguash për të qenë deputet, ku duhet të paguash dhe të tregosh veten se sa i aftë je për të marrë vendin në Parlamentin e ardhshëm, ku nesër duhet të jesh i gatshëm të bësh vetëm çfarë thotë partia jote, ku koka jote nuk vlen dhe nuk ka rëndësi për 4 vite, sepse ka rëndësi vetëm koka e kryetarit të partisë që të ka zgjedhur”, deklaroi Bregu.
