Kryetari i Grupit Parlamentar të Partisë Socialiste, Taulant Balla, ka reaguar ndaj, siç i cilëson ai, shpifjeve të kreut të Partisë Demokratike, Sali Berisha.
Përmes një videoje të shpërndarë në rrjetet sociale, Balla ka hedhur poshtë pretendimet e Berishës, duke i quajtur ato gënjeshtra të qëllimshme dhe duke kritikuar mënyrën se si këto shpifje janë amplifikuar dhe shpërndarë nga media të ndryshme pa verifikim.
“Thënia e Ditës: ‘Gënjeshtra udhëton shpejt, por e vërteta mbërrin gjithmonë.’” – shprehet Balla në reagimin e tij, duke theksuar se përhapja e lajmeve të rreme përbën një rrezik real për shoqërinë.
Sipas Ballës, dezinformimi sjell pasoja konkrete si keqinformimi i publikut, nxitja e zemërimit dhe humbja e besimit tek institucionet dhe media. Ai apelon për më shumë përgjegjësi qytetare, duke nënvizuar se çdo klikim apo shpërndarje pa verifikim i jep forcë gënjeshtrës.
“Të ndalemi, të kontrollojmë burimin dhe të mendojmë kritikisht është një akt përgjegjësie qytetare,” thekson Balla, duke ftuar qytetarët dhe mediat të tregojnë kujdes maksimal përballë lajmeve të rreme.
