Gjyqtarja e rrethit gjyqësor në Lezhë, Parashqevi Ademi, është arrestuar me urdhër të Prokurorisë së Krimeve të Rënda në kushtet e flagrancës. Së bashku me të, prangat i janë hedhur në gjykatë edhe avokatit Gjovalin Prendi.
Sipas prokurorisë, arrestimi i të dyve u krye për veprën e korrupsionit pasiv në bashkëpunim, ndërsa janë sekuestruar si provë materiale edhe 200 mijë lekë të reja, që të dyshuarit po i ndanin me njëri-tjetrin.
Prokuroria thotë se hetimet janë ndjekur nga Prokuroria e Krimeve të Rënda, e cila ka kompetencë hetimin e veprës së korrupsionit.
Çështja është regjistruar pas kallëzimit të një shtetasi, i cili ka vënë në dijeni autoritetet se i kërkoheshin lekë për të shpallur një vendim në favor të tij.
Ditën e mërkurë, Prokuroria e Krimeve të Rënda ka marrë edhe një autorizim nga Këshilli i Lartë i Drejtësisë për arrestimin e gjyqtares Ademi, ndërkohë që operacioni është kryer me taktika stimuluese, sopas prokurorisë. /TOP CHANNEL
