Loenard Muçllari, 28-vjeçari nga Pogradeci, u arrestua pas një bashkëpunimi mes karabinerëve italianë dhe Policisë Shqiptare. Muçllari u arrestua një ditë më parë në fshatin e tij në Leshnicë pasi prej 5 vitesh i ishte arratisur drejtësisë italiane.
Historia e 28-vjeçarit me drejtësinë Italiane nisi në vitin 2011 kur ai u arrestua në Itali për vjedhje me dhunë dhe grabitje. Pikërisht në 26 tetor 2011 ditën që iu caktua masa e sigurisë “arrest shtëpiak”, që ishte edhe ditëlindja e tij, Leonard Muçllari arratiset drejt Shqipërisë.
Menjëherë sapo erdhi në Shqipëri ai vendosi të ndërrojë emër. Nga Leonard Muçllari, merr një identitet të ri me emrin Hasan Muçollari. Në këtë mënyrë ai iu shmang identifikimit për krimet që kishte kryer në Itali, për të cilat në 2014-në, u dënua me 7 vite e 4 muaj burg.
Në 13 gusht të 2012-s, Leonard Muçllari martohet dhe pikërisht kjo martesë ka sjellë edhe zbulimin e tij.
Policia Italiane arriti të kapë një telefonatë fillimisht mes Leonardit dhe babait të tij që jetonte në Itali. Mediat italiane thonë se tradita e do që nusja duhet të marrë në telefon vjehrrën dhe kjo ka zbuluar Leonard Muçllarin, i cili ishte martuar dhe kishte krijuar një jetë të re në Shqipëri. Policia italiane ka përgjuar të gjitha telefonatat si dhe ka regjistruar disa komunikime të Leonardit me të afërm që kishte në Itali, ku është kuptuar se ai kishte krijuar një identitet të ri në Shqipëri dhe frekuentonte disa zona në Pogradec. Identifikimi përfundimtar është bërë pasi në dhjetor 2016 prindërit e Leonardit kanë ardhur të takojnë mbesën e tyre.
Për këtë arsye karabinierët italianë kanë ardhur në Shqipëri dhe kanë shkuar me policinë shqiptare në fshatin Leshnicë në Pogradec, ku kanë arrestuar 28-veçarin. Ai do të ekstradohet drejt Italisë.
