Gjyqi i vrasjes së një ish politikani të lartë në Kazakistan, i cili është akuzuar se ka rrahur për vdekje gruan e tij, ka tërhequr vëmendjen e kombit, duke nxitur thirrje për legjislacion të ri që trajton dhunën në familje. Pamjet tronditëse që tregojnë biznesmenin Kuandyk Bishimbayev, ish-ministër i ekonomisë i Kazakistanit, duke rrahur gruan e tij në një restorant familjar janë transmetuar në internet nga gjykata.
Rasti ka prekur nervin e publikut pasi dhjetëra mijëra njerëz kanë nënshkruar peticionet duke kërkuar ligje të reja për t’i kërkuar përgjegjësitë fajtorëve për abuzim.
Gjyqi i Bishimbayev, 44 vjeç, është i pari në vend që është transmetuar ndonjëherë në internet, duke e bërë atë lehtësisht të aksesueshëm për 19 milionë njerëzit në Kazakistan. Ish-politikani ishte i njohur, pasi ishte burgosur për ryshfet në vitin 2018. Ai kaloi më pak se dy vjet nga dënimi i tij 10-vjeçar në burg përpara se të falej. Bishimbayev u akuzua për torturimin dhe vrasjen e gruas së tij pas vdekjes së saj nëntorin e kaluar.
Për javë të tëra, ai qëndroi i pafajshëm, por pranoi muajin e kaluar në gjykatë se e kishte rrahur dhe “pa dashje” i kishte shkaktuar vdekjen. Saltanat Nukenova, 31 vjeç, u gjet e vdekur në nëntor në një restorant në pronësi të një prej të afërmve të burrit të saj.
Pamjet shqetësuese të kamerave të sigurisë tregojnë të pandehurin, baba i katër fëmijëve, duke e tërhequr zvarrë gruan e tij për flokësh dhe më pas e godet me grushte dhe shkelma. Disa orë pas incidentit, ajo vdiq nga trauma në tru.
Avokatët e Bishimbayev fillimisht kundërshtuan provat mjekësore që tregonin se zonja Nukenova vdiq nga goditjet e përsëritura në kokë. Ata gjithashtu e portretizuan atë si të prirur për xhelozi dhe dhunë, megjithëse asnjë video nga kamerat e sigurisë së restorantit që u shfaq në gjykatë nuk e tregonte atë duke sulmuar Bishimbayev.
Dhjetëra mijëra njerëz në vend kanë nënshkruar një peticion duke kërkuar masa më të ashpra ndaj autorëve të dhunës në familje pas vdekjes tragjike të zonjës Nukenova. Nënshkrimet rezultuan në miratimin e senatorëve të një projekt-ligji që ashpërson ligjet e abuzimit bashkëshortor muajin e kaluar, i quajtur “Ligji i Saltanatit”.
Aitbek Amangeldy, vëllai i zonjës Nukenova dhe një dëshmitar kyç i prokurorisë, tha për Associated Press se nuk kishte dyshim se fati tragjik i motrës së tij ka ndryshuar qëndrimet rreth dhunës në familje. “Kjo ndryshon mendjen e njerëzve kur ata shohin drejtpërdrejt se si duket kur një person torturohet.”
