Një ditë pasi pranoi se është autori i vrasjes së bashkëshortes 20-vjeçare Caroline, piloti 32-vjeçar Babis Anagnostopulos u shoqërua sot për në zyrën e prokurorit, në masa të rrepta sigurie.
Në këto pamje të publikuara nga mediat greke, autori i vrasjes shfaqet i heshtur, gjakftohtë, me maskë dhe jelek anti-plumb, teksa efektivët e shoqërojnë drejt hetuesisë.
Një ditë pas dëshmisë rraskapitëse 8-orëshe Babis Anagnostopulos ka “kyçur” sot gojën, duke mos dhënë asnjë koment për gazetarët. Mediat helene raportojnë se autori i krimit makabër mund të kërkojë disa ditë kohë për të përgatitur mbrojtjen e tij ligjore.
“E vrava Karolinën, e mbyta me jastëk. Shkak u bënë konfliktet që kishim atë natë. Hodha fëmijën në krevat. E mbyta dhe më pas mendova grabitjen,”- tha gjatë dje në dëshminë e tij 32-vjeçari.
I pyetur përse kishte heshtur deri më sot duke luajtur “teatër”, ai tha se kishte frikë se fëmija i tyre i vogël do të mbetej pa kujdestar.
Dyshohet se gjatë sherrit fatkeqja Caroline e kishte paralajmëruar 32-vjeçarin se do të largohej nga shtëpia dhe se do të merrte me vete fëmijën e tyre. Nuk dihet ende kujt do t’i kalojë kujdestaria e vajzës 11-muajshe të Carolinë, e cila ndodhej në dhomë kur u vra e ëma.
Megjithatë duke iu referuar ligjeve greke kompetencat e kujdestarisë mund t’i kalojë të afërmve të Caroline në Alonissos ose familjes së pilotit të akuzuar./m.j
