Mediat në Kosovë bojkotuan këtë të mërkurë kreun e Lëvizjes Vetëvendosje, Albin Kurti, pas refuzimeve të përsëritura të tij për t’u prononcuar para gazetarëve.
Në shenjë proteste, përfaqësuesit e mediave vendosën mikrofonët në tokë përpara Kuvendit të Kosovës, duke refuzuar mbulimin mediatik të Kurtit, teksa ai po dilte nga Kuvendi.
Ky veprim simbolik erdhi pas pesë tentativash të pasuksesshme për të marrë një deklaratë publike nga Kurti gjatë seancave të konstituimit të Kuvendit. Në të gjitha rastet, lideri i Vetëvendosje-s ka shmangur komunikimin me shtypin.
Gazetarët theksuan se ky bojkot nuk është një akt armiqësor, por një reagim ndaj mospërfilljes së vazhdueshme ndaj rolit të medias dhe të drejtës së publikut për informacion.
Deri më tani, nuk ka pasur një reagim zyrtar nga Kurti apo Lëvizja Vetëvendosje në lidhje me bojkotin e sotëm nga mediat.
